Mondragon Unibertsitatea hotz sartu da partiduan. Ez dira fin aritu erasoan, eta saskiratzeetan ere ez dute larregi asmatu. 15 eta 20 amaitu da lehen laurdena. Bigarren laurdenean gauzak hobeto egin ditu MUk, bai erasoan eta bai defentsan, eta lanerdietan aurretik ziren arrasatearrak, 38 eta 35.
Atsedenaldiaren ostean, Leclercen jokalari gakoak oso ondo defendatu dituzte Eneko Mataren mutilek, eta zailtasun handiak izan ditu aurkariak, erasoan asmatu ezinda. Azkenerako, estuasunik gabe lortu du finalerako sailkapena MUk.
Finala bihar, domeka, izango da, 12:30ean, Baskoniaren kontra (zuzenean jarraitu ahalko da, GOIENA.EUSen). Baskoniak 63 eta 75 hartu du mendean Obradoiro beste finalerdian.
Duela astebete jokatu zuten MUk eta Baskoniak Arrasaten, liga erregularreko azken jardunaldian. Partidu handia egin zuten arrasatearrek, eta 92 eta 87 irabazi.