Pirinioetako Astate eta Iparla mendiak argiztatzea egokitu zaie arrasatearrei Gure Eskuren dinamikan

'Pirinioetako Bidea - Via Pirinenca' ekimenaren baitan, katalan eta euskal herritarrek Piriniotako 300 gailurretatik gora argiztatuko dituzte uztailaren 2an, "gure herrien autodeterminazio eskubidearen alde". Ekitaldian parte hartu nahi duenak Portaloian eman ahalko du izena bariku eta zapatu honetan, 18:30etik aurrera.

Arrasatearrek bi mendi argiztatzeko aukera izango dute, Iparla mendia, dituen ezaugarriengatik Besaide mendizale elkarteak kudeatuko duena, eta Astate mendia –Buztanzelai eta Iparla mendien artean dagoen tontorra–, Arrasateko Gure Eskuko kideek kudeatuko dutena. "Hasiera batean Iguzkimendi mendia egokitu bazitzaigun ere, Arrasateko Gure Eskuko hainbat kidek bertara egindako irteera baten ondoren, irisgarritasun arazo gehiegi ematen zirela ondorioztatu genuen eta mendiz aldatzea erabaki zen, Astate mendian arazo horiek guztiak ekiditen zirela ziurtatuz", adierazi dute.

Jada izena emateko epea zabalik dago eta, horregatik, "herritarrei gauzak errazte aldera, hainbat egunetan, mahaiak aterako ditugu kalera eta horien berri astero emango dugu". Bertan, beharrezko informazio guztia emateko eta zalantzak argitzeko egongo dira Arrasateko Gure Eskuko kideak: "Gainera, ekimenaren egunerako atera ditugun kamiseta berriak ikusteko eta eskatzeko aukera ere izango da".


IZEN-EMATE MAHAIEN LEHEN PARADAK:

  • OSTIRALA, apirilaren 29a, 18:30ean: Portaloian
  • ZAPATUA, apirilaren 30a, 11:00etan: Portaloian

Honakoa gaineratu dute: "Erronka kolektibo erraldoi bat dugu aurrean; Herria batu, saretu eta ahalduntze prozesu honetan, burujabetzarako bidean, salto kualitatibo eta kuantitatibo bat ematera goaz. Egin dezagun posible!".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.