Menpekotasuna duten gazteen senideak ari dira, gehienbat, ikastaroan parte hartzen eta elkarteko kideen esanetan, ikasteaz gain, "gune atsegin" bat aurkitu dute esperientziak partekatzeko.
Gabriela Michel hezitzaileak gidatzen ditu saioak, ordubete ingurukoak, eta hainbat alor jorratzen dituzte emozioak ezagutu, ulertu eta kudeatzeko. "Hezkuntza emozionala pertsona ororen bizitzako giltzarri da, are gehiago inguruan arazoak daudenean, menpekotasuna duten gazteen senideei gertatzen zaien moduan", nabarmendu dute elkartetik.
Hala, Michel senideekin kolaboratzen ari da duela bi urte ezkero, elkartea sortu aurretik, eta "oso ondo ezagutzen ditu senideetako asko".
Datozen hilabeteeetan ere aurrera jarraituko dute ikastaroarekin eta, hezitzailearen esanetan, parte-hartzaileei askotariko erremintak eskaintzean datza ikastaroa, "elkarrizketaren eta autoezagutzaren bitartez, emozioak ahalik eta ondoen kudeatzeko eta, hala, bizitza orekatuago bat eduki ahal izateko".