Izugarria izan da Arrasate-Udalatx mendi lasterketaren seigarren edizioak eman duena. Eguraldia lagun, jende asko batu da ibilbideko zenbait lekutan, eta mendi lasterkariek neurria eman dute. Esaterako, irabazleek bai emakumezkoetan eta baita gizonezkoetan ere orain arteko errekorrak ondu dituzte.
Gontzal Murgoitio, indartsu
Plazako helmugara lehenengo iritsi dena Gontzal Murgoitio elorrioarra izan da. Orain arte Asier Larruzeak zuen zuen errekorra –1.47.37– ondu du, 1.47.22ko denbora eginda. Lasterketaren buruan izan da hasieratik: "Udalaraino bost laguneko taldetxoan joan gara, baina oso indartsu nengoela ikusi dut eta Udalaitzera igotzen erritmoa gogortu dut". Hala, elorrioarra aurrean izan da lasterketa guztian zehar.
Udalatik Udalaitzerako zatia 21 minutu eta 26 segundotan egin du.
Onditz Iturbe, arerio gabe
Emakumezkoetan Onditz Iturbek ez du areriorik izan. Hasieratik jarri da lasterketaren buruan, eta atzean utzi ditu Oihana Azkorbebeitia eta Malen Osa. Onditzek, gainera, Azkorbebeitiaren errekorra –2.11.06– ondu du 2.07.32ko denbora eginda.
Onditzek 25 minutu eta 24 segundotan egin du Udalatik Udalaitzerako zatia.
Arrasatear onenak
Atzetik aurrera etorrita lasterketa bikaina egin du Aritz Kortabarria arrasatearrak. Bada, hirugarren postua eskuratzeaz gain arrasatear onenaren saria ere eroan du Kortabarriak. Emakumezkoen sailean, arrasatear onena Ane Zabala izan da, 2.35.05 denborarekin.
Podiuma osatu dutenak
Emakumezkoetan, podiuma osatu dute Oihana Azkorbebeitiak –2.11.17– eta Malen Osa oñatiarrak –2.13.31–. Udalaitzeko tontorrera Azkorbebeitia iritsi da lehenengo; baina, beherantz oso ondo dabil Osa eta aurre hartu dio Besaidera iritsi orduko. Azkeneko kilometroetan, oñatiarra jausi egin da eta Azkorbebeitiak lortu du bigarren postua.
Gizonezkoetan Asier Larruzea iritsi da bigarren –1.50.13– eta hirugarren egin du Aritz Kortabarriak –1.54.37–.
Beteranoen sailean, Oihana Azkorbebeitiak irabazi du emakumezkoen saria eta Unai Intxaurragak gizonezkoena.
Behin betiko sailkapenak hemen ikus daitezke.
