Futbol modalitate bat da Walking Football, "bizimodu aktiboa mantentzen eta ondo pasatzen laguntzeko" diseinatua, fundazioko kideen esanetan. "Futbolean jokatzean datza, baina aldaketa batzuekin: oinez jokatuko da eta ezin izango da korrika egin, kontaktua saihestuko da eta ezin izango da baloia buruaren gainetik altxatu, beste arau batzuen artean". Ekimen honen baitan, Realeko entrenatzaile batek astean behin ordu eta erdiko entrenamendua egingo du Mojategin, martxoaren 23an hasita. Eguaztenetan izango dira saioak, 11:00tatik 12:30era.
Arrasaten bakarrik ez, Zubietan eta Beasainen ere egingo dituzte entrenamendu saioak, eta hemen eman daiteke izena. Horrez gain, izen emate orriak egongo dira Arrasateko Musakolako kiroldegian, Biztanle Arreta Zerbitzuan (BAZ) eta Eskoriatza, Aretxabaleta, Oñati eta Bergarako kiroldegietan.
Proiektu honek Adinberriren, Donostia Lagunkoiaren, Matia Fundazioaren, Adinkideren, Agujipensen (Gipuzkoako jubilatu eta pentsiodunen elkartea), Arrasateko Udalaren eta Beasaingo Udalaren babesa du. "Zalantzarik izanez gero, fundazioa@fundazioa.realsociedad.eus helbidean, 943 46 28 33 telefonoan edo Musakolako kiroldegira deituz argitu daitezke".
