Ukrainarrei laguntzeko Arrasaten egindako bilketan material asko jaso dutela azaldu du Ekin Emakumeak elkarteko Jasone Giraldok. Batez ere berokiak eta eguraldi hotzetik babesteko jantziak, higiene produktuak eta lehen arretarako produktuak jaso dituztela zehaztu du.
Herritarrek emandako erantzuna eskertu, eta kamioia kargatzeko deialdiak aurreikuspen guztiak gainditu dituela aitortu du: "Bagenuen boluntario saretxo bat, baina logistikagatik jendea beharko genuela bagenekien eta deialdi bat zabaltzea erabaki genuen. 15:30etarako zegoen eginda deialdia, baina aurretik jada jendea hasi da biltzen, eta erantzuna itzela izan da".