Loraldia jaialdiaren baitan, Terminal aretoan izango dira lau artista arrasatearrak. "Ikuskizunak gorputza du abiapuntu, eta gorputza jomuga: azala, aurpegia eta odola dira proiektuaren hiru hariak", azaldu dute jaialdiko antolatzaileek.
Iazko apirilean argitaratu zuten Maria Osesek eta Libe Argoitiak Fereka izeneko poesia liburu ilustratua, eta, hortik abiatuta, 70 minutu irauten duen Gorpuztu ikuskizuna sortu dute orain, Ekiñe Casado eta Iraitz Agirre musikariak agertokian lagun dituztela. "Lauron barrenak elkartzen diren puntuan kokatzen da Gorpuztu lan berria. Bakoitza bere diziplinaren mugetatik haratago joan nahiak bultzatu du elkarlana".
Sarrerak, 'Loraldia.eus'-en
Arrasateko artisten ikuskizunerako sarrerak Bilboko jaialdiaren atarian eskura daitezke, bost eurotan.