Euskal Kopako finala jokatu dute MU Ointxek eta Tabirakok Iturripen, eta markagailuan aurretik partida osoan joan ostean, garaipena bizkaitarrek erdietsi dute (67-64). Hala ere, Ointxeko gazteek maila polita erakutsi dute, esperientzia handiagoa duen talde baten aurka.
Hasiera traketsa izan du MUk kantxan. Lehenengo laurdenean hotz irten dira kantxara zuri-moreak, eta Tabirakok ez du erasoan barkatu (10-6). Erasoan ere ez dira fin ibili etxekoak, eta aldea aise handitu dute durangarrek (16-6). Erasoko errebotean min handia egin dio Tabirakok MUri eta lehen laurdena 18-9koarekin bukatu da.
Bigarren laurdenean Arrasateko taldeak asmatu ezinik jarraitu du. Durangoko taldeko jokalariek euren esperientzia ederki baliatu dute, eta markagailuko aldea nabarmen handitu dute (31-12). Ointxek erantzun ona eman du 8 puntu jarraian eskuratuta, baina Durangokoek erasoan bikain jarraitu dute, eta atsedenaldi luzera, 42-27koarekin joan dira.
Atsedenaldiaren ostean, zuri-moreen erantzun bikaina etorri da. Erasoan gustura ibili dira arrasatearrak eta 44-33koa jarri ondoren, gogor sakatuta eta defentsako presioa igota, zortzi puntura gerturatu dira markagailuan (49-41). Gazteek maila polita erakutsi dute Iturripeko kantxan eta laurden erabakigarrira 54-45koarekin heldu dira bi taldeak.
Azkenengo laurdenean etorri da MUren erantzun bikaina. Hirukoak saskiratzen hasi dira etxekoak bata bestearen ondoren, eta puntu bakarrera jarri dira markagailua (60-59). Hala ere, Tabirako ez da behera etorri eta neurketa bukatzeko hiru minuturen faltan erantzun ikusgarria eman dute durangarrek (65-59). Ointxekoek ez dituzte besoak jaitsi eta finala bukatzeko bost segundoren faltan hiru puntu markagailuan azpitik eta baloiaren jabetzarekin heldu dira (67-64). Partida luzapenera eramateko jaurtiketa izan du bere eskuetan MUko kapitainak, baina baloia ez da saskian sartu eta garaipena Tabirakok erdietsi du.
