Egueneko saioan honako hauek hartuko dute berba: Walter Cuc, Irrati-Eskolen Guatemalako Federazioko zuzendaria eta Lucía Ixchiu eta Carlos Cano, Festivales Solidarios elkartearen sortzaileak. "Elkarte horretan herri eta lur guatemalarraren alde egiten dute lan, ikerkuntza eta komunikazioa ardatz hartuta".
Bi erakundeetako ordezkariek Guatemalako jazarpen eta kriminalizazioa izango dute berbagai, bereziki giza eskubideen defendatzaileek eta kazetariek pairatzen dutena. "Horrez gain, herrialde horretan ematen diren eskubide urraketak mundu guztiari ezagutzera emateko salaketa publikoa ere egin gura dugu".
Egueneko solasaldia guztiz irekia izango dela azaldu dute Ezker Anitza-IUko ordezkariek, "Guatemalan giza eskubideek duten egoerari buruzko eztabaida aberasgarria sortzeko, eta baita elkarte hauek egiten duten lanari balioa emateko ere".
