Ezohikoa da herri bereko bi talde elkarren kontra lehiatzea, are gehiago klub berekoak izanda. Gipuzkoako emakumezkoen kadete mailako B ligan gertatuko da, Ingou Arrasateren bi ordezkaritzak –A eta B– nor baino nor arituko baitira etzi, 12:00etan hasita, Iturripeko kiroldegian. Duela hilabete jokatu beharreko neurketa zen, baina atzeratu behar izan zuten COVID kasuak tarteko.
Ane Herrero da A taldeko entrenatzaileetako bat. Azaldu du kadeteetan "jokalari asko" zeudelako egin zutela bi talde. Berak zuzentzen dituenak lehen urtekoak dira, sailkapenaren erdialdean daude, eta azken partiduan garaipena eskuratu zuten Leizaranen aurka. B taldean, aldiz, lehen eta bigarren urteko jokalariak daude; zapatuan Urnietarekin indarrak neurtzetik aurkeztuko dira derbian, azken postuetatik aldentzeko gogoz.
Gertatzen dena gertatzen dela, klubaren emakumezkoen harrobia irtengo da garaile: "Ea gai garen oinarri honekin seniorretatik infantiletara ordezkaritza ateratzeko, gerora begira".
