Aniztasun funtzionala duten gazteekin sormena eta askatasuna bultzatzen dituzte BASH taldean, dantzaren eta musikaren laguntzarekin. Hiru urte daramatzate Arrasaten lan egiten baina gaurko saioarekin are inklusiboagoa egin nahi izan dutela azaldu du bertako koordinatzaileetako bat den Ane Davilak: "Gaurkoan, adibidez, Beñat Barrutiak eskaini digu ilusio handiz prestatutako saio bat, eta gainerako gazteek ere erreferente bezala ikus dezakete".
"Protagonista izatea"
Davilak azaldu duenez, "osagai nagusia ondo pasatzea da": "Barre egitea, jende berria ezagutzea...baina batez ere espazio seguru batean egotea, beraien autentikotasun hori ezagutzera ematea modu librean". Konfiantza hori lantzeko, programak jarraikotasun bat izatearen garrantzia azpimarratu du: "Bakoitzaren beharrak ezagutu, gustatzen zaiena identifikatu eta beraien pertsonetara egokitzeko aukera emate du. Lehen saioetan adibidez ikusten da lotsatuta egoten direla, baina behin konfiantza hartuta, ideiekin etortzen dira, edo koreografiak eskatzen dizkigute. Azken batean, beraien protagonista izatea nahi dugu".
Senideen garrantzia
Senideek ere parte hartu dute gaurko saioan: "Orain arte gurasoek atzetik ikusi dute prozesua, hiru urtean zehar. Benetan ez zekiten nolakoak ziren espazioak eta oso garrantzitsua iruditzen zaigu beraiek ere honen parte egitea".
