Fernando Gorostidiren gidaritzapean, lau izarreko hotela izateko lanean ari da talde berria eta, norabide horretan, sukaldetik hasi dute eraldaketa. Hala, Jokin Arroyo eta Pablo Loureiro sukaldeko buru direla, askotariko eskaintzaz goza daiteke dagoeneko: karta, eguerdi zein gauerako eguneko menua, asteburuko menua, taldeendako menua eta dastatzeko menua. Gainera, garaian garaira egokitutako aldaketak egingo dituzte, hilabetero eskaintza aldatuz. Tabernako eskaintza ere zabala da, garaian garaiko pintxoekin eta askotariko errazioekin.
Euskal sukaldaritza tradizionalean oinarritutako eskaintza dute, baina eguneratua eta modernoa, aldi berean. "Hori dela-eta, parrilla ere izango da jatetxearen nortasunaren bereizgarri nagusietako bat", nabarmendu dute sukaldariek.
Bertako produktuen garrantzia
Hotelak kokapen ona eduki arren, orain arte "herritarrengandik urrun" egon dela iruditzen zaie, eta hori aldatzea gura dute. "Hotela herritarrengana gerturatzea eta haiekin konektatzea gurako genuke. Inportantea iruditzen zaigu arrasatearrek hotelera etortzeko gogoa izatea eta haiendako ere erakargarria izatea, eta, horretarako, gertuko ekoizleekin ari gara lanean: nekazariak, gaztagileak eta abar".
Pablo Loureiro sukaldaria da eskaintza gastronomikoan kolaboratuko duen erreferente gastronomikoa, eta sukaldeburua, berriz, Jokin Arroyo oñatiarra da, azken hiru urteetan Oñatiko Hotel Torre Zumeltzegi jatetxeko sukaldeburu izan dena eta, era berean, sukaldeko beste hainbat teknika berri ikasten ari dena. "Gainera, bere ortua ere badauka eta bertako produktuekiko sentsibilitate handia du", dio Loureirok.
Askotariko bezeroak jomugan
Arrasatearrez eta debagoiendarrez gain, askotariko bezeroak erakarri gura dituzte. "Arrasatera eta Debagoienera jende asko etortzen da lanagatik eta bisita kontuengatik. Beraz, gura duguna da bezero horiei kalitatezko ostatu eta sukaldaritza zerbitzua eskaintzea". Era berean, Arrasate Euskal Herriaren erdian dagoela nabarmendu dute eta turistendako aproposa dela bertan geratzea, hiriburu gehienetatik gertu dagoelako. "Turista horiek erakarri gura ditugu, era berean, Debagoieneko turismoa ere sustatuz", azpimarratu du Fernando Gorostidik, hotelaren arduradunak.
Aparkalekuetan, erraztasunak
Laubide eta Biteri aparkalekuetan aparkatzeko erraztasunak ere eskainiko ditu hotelak, egonaldia "atseginagoa eta lasaiagoa" izan dadin. "Ez dugu nahi aparkalekua arazo bat izaterik".
Halaber, apurka aldaketa gehiago egiten joango dira. "Pixkanaka eboluzio bat izango du jatetxeak, hotelaren berritze osoarekin borobilduko dena".
Pablo Loureiro eta Casa Urola
Ostalaritzan errotutako sukaldariak Donostiako Rodil jatetxe ezagunean ekin zion bere ibilbideari. Haren aitonak sortu zuen jatetxea, gurasoek eman zioten jarraipena, eta txikitatik usaindu izan du euskal sukaldaritza tradizionalaren esentzia.
Gerora, Branka jatetxeko sukaldearen ardura hartu zuen eta 2012an, Begoña Arenas emaztearekin batera, gaur arte bere proiektu pertsonala izan dena martxan jarri zuen: Casa Urola jatetxea. 2019an, Gastronomiako Euskadi saria jaso zuen.
Plateretako batzuk