Tentsio handiko partidak izaten dira Bankoa Abanca-DV txapelketako finalak, eta arrazoi horregatik sarri ez dira partidu ikusgarriak izaten. Ez da hori pasa gaurko senior mailako finalean. Oso neurketa parekatua jokatu dute bi bikoteek, elkarren arteko alderik nabarmenena lau tantokoa izanik.
20-21 galtzen iritsi dira Murua eta Irazustabarrena azken txanpara, eta Expositoren huts batek azken tantoa jokatzeko sakea eman die. Muruak txapela eramateko aukera paregabea izan du ezker gantxoa egitera ausartuz, baina bere errematea ez da txapa gainera iritsi. Arrasatearrak GOIENAri aipatu dio gogoratuko dela huts horretaz "egun batzuetan zehar". Abenduaren 31n zauriak sendatzeko abagune aproposa izango du Zaldibarko binakako finalean, gaur aurkari izan duen atzelaria izango duelarik laguntzaile.
Lagunen babesarekin
Zarauzko Aritzbatalde frontoira pilotazale ugari hurreratu dira kategoria ezberdinetako neurketak ikustera, Muruaren lagunak tartean. Adierazi diotenez, kanpotik "gustura" jarraitu dute partidua, "oso lehiatua" izan delako: "Aukeran, ordea, nahiago nuen lehia gutxiago egon eta erraztasunez irabaztea, baina aurkariak oso serio aritu dira eta ahal izan dugun guztia egin dugu", adierazi du Muruak. Guztira zortzi tanto amaitu ditu, eta azpitxapeldun izan bada ere, "egindakoarekin konforme" gelditu da aurrelaria.