Gabonak ate joka daudela-eta, Arizmendi ikastolako Santa Teresa guneko lehen eta bigarren zikloko ikasleek Musakola Bizirik proiektua burutu dute azken aste hauetan. Hori horrela, ikasleak buru belarri aritu dira auzoko txoko eta komertzio desberdinetan informazioa jasoz.
Proiektuaren helburua "auzoko komertzio txikiari laguntzea, indartzea eta ikasleak auzoko komertzio txikian kontsumitzeak duen onuraz jabetzea" izan dela adierazi dute hezkuntza zentroko arduradunek. Gainera, bukaerako lan bezala spot bat egin dute, azken hamarkadetan auzoak izan duen bilakaera irudikatu nahian.
Martitzenean, postalen banaketa eta kantaldia
Horrekin batera, ikasleek gabonetako postalak egin dituzte, abenduaren 21ean auzoko komertzio txikietan banatzeko. Bertan kontsumituko dituzten bezeroek, trukean, aukera izango dute postal horiek jasotzeko. Egun berean, goizeko 12:00ak aldera, kantuz eta beharrezkoak diren neurriekin "ez-ohiko itxiera" emango diote urteari San Isidroko plazan. Hainbat gabon kanta abestuko dituzte auzoko partaide desberdinekin.
