Musika emanaldiz beteriko egunak izango dira gaurkoa eta jarraian datozenak, Santamas Komisiñuak eta Ibai-artek hainbat proposamen ekarriko dituzte-eta, Udalarekin elkarlana sustatuta.
Gaur, barikua, Los Brazos taldeko William Rodriguezek Arbolapetan emango du kontzertu akustikoa, 19:00etan hasita; herritarrek gogoan izango dute Arrasate Blues jaialdian aritutako artista.
Zapatuan, berriz, Herriko Plaza izango da Arrasate Trikitixa Eskolako ikasleen agertokia, 19:00etan hasita. Jarraian taularatuko dira, 20:30en bueltan, Leire Etxezarreta eta Pello Heriz arrasatearrak; bertsioak eta kantu propioak joko dituzte, gitarrak eta ahotsak erabiliz musika tresnatzat.
Astelehenean, gehiago
Toki berean eta formatu berarekin baina beste kantutegi bat lagun arituko dira Zahara Galan eta Borja Gomez astelehenean, hilak 20, 19:15ean hasita. Ondoren, Gabonetako 50 otarreak banatuko ditu Ibai-artek.
