Gabonak ate joka daude eta Debagoienako herrietan nabaritu egiten da. Arrasaten, esaterako, atzo piztu zituzten Gabonetako argiak. Aurten, Aspace eta Atzegi elkarteak izan dira piztueraren arduradunak, 50 eta 60 urte bete dituztelako, hurrenez hurren. "Ohore bat da guretzat, azken finean errekonozimendua ematen zaielako elkarteetako erabiltzaileei. Honetan, Debagoienak indar asko egin du historikoki eta gaur beste behin erakutsi du garrantzi hori", adierazi du Izar Zubietak, Atzegiko Debagoienako arduradunak.
Gabonetako argiak urtarrilaren 7ra arte egongo dira piztuta. Guztira 90 egitura ezberdin jarri dituzte herrian zehar, eta berrikuntza bezala 14 metroko zuhaitza jarri dute Biteri Etorbidean. Batean zein bestean, energia kontsumo baxuko argiteria jarri dute eta jasangarria da ingurumenarekin.
