Lider moduan etorri zen Touring Mojategira baina atzokoan ere argi geratu zen Ohorezko Erregional Mailan oso parekatuta daudela indarrak, edozein taldek beste edozein menderatu dezakeela. Hasieratik saiatu zen Mondra Touring estutzen baina Oreretako taldeak argi utzi zuen ez zela partidu erraza izango. Bi ateetan aukera larregi izan barik zihoan partidua, harik eta Touringek ezustean 0-1koa egin zuen arte. Kolpea izan zen arrasatearrendako eta atsedenaldira bitartean ez zuten apenas aukerarik sortu berdinketa lortzeko.
Bigarren zatian, baina, gorantz egin zuen Mondrak. Eta saiakerek izan zuten bere fruitua, Ander Arroyok banakoa lortu zuenean. Pozik zegoen Arroyo golarekin: "Astean zehar lan izugarria egin dugu partidua prestatzeko. Bageniekien ez zela erraza izango, baina, liderra izan arren, aurre egin ahal izan diegu. Partidua parekatua izan da; beraiek ez dituzte aukera askorik izan, gu, berriz, gogoz irten gara, lana eginez, eta garaipena lortu dugu. Gola ere aspaldi sartu barik, tokatzen zen bat sartzea, batez ere, maila pertsonalean konfiantza hartzeko".
