ELA sindikatuak "positiboki" baloratu du azken hilabeteetan Aita Mennin deitu dituzten greba egunek izandako jarraipena. Enpresaren zuzendaritzaren eta hainbat langileren arteko tirabirak hasi zirenetik hamar greba egun deitu ditu sindikatuak erakunde arrasatearrean; azken hiruak aste honetan bertan. Eusko Jaurlaritzaren aurrean egindako elkarretaratzearekin hasi zuten geldialdi astea, eta asteazkenean Gesalibarko zentroaren atarian egindako kanpaldiaren ostean, gaur amaitu dute hiru eguneko grebaldia Arrasateko erdigunean egin duten manifestazioarekin.
Prentsa ohar bidez jakitera eman dutenez, "langileenganako presioarekin, greba eragin gabe utzi nahi izan du enpresak eta langileen batzordea gainontzeko lankideen aurka jartzea nahi izan du". Bide horretan, ELAk "gogor" salatu du enpresak izandako jarrera: "Non dago langileenganako eta pazienteenganako errespetua?"
Greba dinamiken indartzea
Enpresaren zuzendaritzak jarrera aldatu ezean eta gatazka hau konpontzeko "urrats errealak" eman ezean, langileek mobilizazio eta greba dinamikak indartuko dituztela iragarri du sindikatuak. "ELAk langileen eta pazienteen ongizatea bermatzeko beharrezko urratsak ematen jarraituko du", adierazi dute.