ELA sindikatuak deituta, Eusko Jaurlaritzaren egoitzaren aurrean bildu dira gaur Aita Menni zentro psikiatriko arrasatearreko hainbat langile. Sindikatuak prentsa ohar bidez adierazi duen bezala, langileek lau urte daramatzate hitzarmena sinatu gabe, eta besteak beste, "lanaldien jeitsiera, langileen rotazioarekin amaitzeko eta kontratazioa arautzeko neurriak edota lan osasunari dagokion neurriak" eskatzen dituzte greban dauden langileek.
Bada, osasun mentalaren alorrean Aita Mennik Osakidetzak eskaintzen ez duen zerbitzua ematen duela argudiatuta, eta Foru Aldundiek zein Eusko Jaularitzako Osasun Sailak itundutako zerbitzua dela kontuan izanda, Eusko Jaurlaritzaren egoitzaren aurrean bildu dira hainbat langile. "Administrazioek ere badute zeresana gatazka honetan", adierazi dute prentsa ohar bidez, eta bide horretan, "Osasun Sailari langileekin biltzeko eskaera" egin nahi izan diete, "ospitaleko langileen zein pazienteen berri eman eta gatazkaren konponbidean esku hartzeko" iradokiz.
Mobilizazioak bihar eta etzi
Gaurko zazpigarren greba eguna, baina, ez da azkena izan. Izan ere, bihar eta etzirako ere greba deialdia egin du ELA sindikatuak, bina mobilizaziorekin. Lehena bihar bertan, asteazkena, goizeko 11:00tik aurrera, ospitale aurrean kanpaldi bat eginez; bigarrena, aldiz, etzi, osteguna, Arrasateko plazatik abiatuko den manifestazioarekin (11:30).
