Jabetze Eskolan hausnarketa egin dute hitanoaren eta bereziki nokaren erabileraren galeraren inguruan, eta beharra ikusi dute nokaren erabilera sustatzeko. Galdera eta kezka asko plazaratu dira, Emakume Txokoko arduradunek azaldu dutenez: “Hikaren galera nabarmenena da. Noka, berriz, are azkarrago ari da desagertzen. Nokaz birjabetzeak balio dezake emakumeak ahalduntzeko? Zergatik toka da noka baino erabiliagoa? Zergatik izan du duela gutxira arte ospe txarra? Hika berreskuratu daiteke feminismotik? Queer garaian hitanoa? Hitanoa egin daiteke ez bitarra? Baina zelan egin, ez badakigu? Ingo jonau?”.
Bistan denez, AmaHika ikusteko saioa ez da izango ohiko saio bat, hausnarketa eta eztabaida herrira zabaltzeko asmoz antolatu baita bertso saioa. Beraz, emanaldi berezia izango da, nokaren erabilera sustatzeko eta ikusarazteko, eta herritarrak gonbidatu dituzte bertara hurbildu daitezen.
