Ekainean abiatu zuten Baterajotzea eta orain arte "gelditu gabe" ari dira lanean. Orain, Mugimenduan gaude, lurrikara gara lelopean egingo dituzten Baterajotze horietan, neska gazteek krisi anizkoitzari nola erantzun behar dioten hausnartuko dute, "neska gazte subjetu politikoa berrezaugarritzeko eta gure problematika propioak mahaigaineratzeko".
Nabarmendu dute "momentu berezian" datorrela baterajotzea. "Mundu mailako pandemia batek eztanda egin duen momentuan eta sostenga ezina den sistema oso bat inoiz baino ikugarriagoa egin denean, hain zuzen ere. Azken urte hauetan argi ikusi dugu sistema honetan bizitzak baino, kapitalaren interesak daudela zentroan eta eredu horrek bizitza bera erasotzen duela. Horregatik diogu hau ez dela osasun krisia, krisi sistemikoa baizik".
Era berean, neska gazteen prekarietatea "areagotu" egin dela salatu dute. "Herri mugimenduentzat antolakuntza eta jarduera politikoa sustatzea zaila izan da, sareak eta aliantzak ehuntzeko arazoak egon dira eta abar. Mugimendu sozial guztien eragin gaitasuna murriztuz, eta, orain indar guzti hori berpizteko unea heldu da".
Aurrera begirako erronkak zehaztera
Topaketaren helburu nagusia izango da mugimenduaren aurrera begirako erronkak zehaztea, "krisi anizkoitz honek neska gazteoi nola eragiten digun eta horren aurrean zein pozisio hartu nahi dugun izango dugu eztabaidagai, azken hau eztabaida zentrala izanik". Egitarauari dagokionez, askotariko hitzaldi eta tailerrak egongo dira aukeran, hala nola, ekofeminismoa, prekarietatea, zaintza lanak, sexualitatea eta abar(izen-ematearekin batera aukeratu beharko da). Bestalde, larunbat gauean aisialdi eskaintza egongo da askotariko sortzaileen eskutik eta hau ere izen-ematearekin batera aukeratu beharko da.
Izen-ematea zabalik dago
Azkenik, Baterajotzean izena emateko Euskal Herriko Neska Gazteak-en web orrian betebeharreko inkesta bat dago. Datu pertsonalak eta astebururako hautau beharreko hitzaldiak eta aisialdi eskaintzak aukeratzeko. Aldi berean, bonoak egongo dira, pasatu nahi diren egunen araberakoak. Informazio guztia webgunean dute.