12:00etan herritar ugari batu dira Monterronen, Bizi osorako zigorrik ez! Giza Eskubidea, elkarbizitza, konponbidea lelopean egindako elkarretaratzean. Nahikari Otaegi Sareko bozeramaileak hartu du hitza, eta azaldu du, gaurko egunean, legea salatzeaz gain, egun hauetan jasandako "presio eta manipulazioa" salatzeko ere baliatu nahi dutela agerraldia. "Auzi honetan, hainbat hedabide, alderdi politiko eta baita instituzioetatik ere erantzukizunik gabeko jarrerak hartu dituzte. Honela, espetxe-politikan edozein aldaketa errefusatzen duten horien jarrera indartu dela salatu nahi dugu", adierazi du Otaegik.
Azken hilabeteen inguruko balorazio positiboa egin du Sarek, izan ere, presoen eta senideen eskubideak urratzen dituen salbuespen legediari "amaierara eramateko bidea" zabaldu dutela adierazi dute.
Bestetik, gaur Arrasaten egin diren bestelako deialdien harira, gogorarazi nahi izan dute Sarek "giza eskubideak defendatzen jarraituko duela": "Indarkeriaren biktimak eta pertsona guztien giza eskubideen errespetua kontrajarri nahi izan dituzten horiei gogorarazi nahi diegu giza eskubideak ezin direla partzelatan bereizi. Ezin dira batzuk defendatu, eta beste batzuk mespretxatu". Otaegik azpimarratu du bateragarriak direla Sarek biktimekiko duen errespetua eta giza eskubideen "edozein urraketaren aurrean" egiten duen salaketa.
Sareren elkarretaratzearen kontrako agerraldiak
10:30ean, Carlos Iturgaitz buru, Alderdi Popularreko ordezkariek agerraldia egin dute San Josepen, "terrorismoaren biktimak omentzeko" asmoz eta Sarek gaur egin duena "omenaldia" dela salatuz. Minutu bateko isilunea egin dute.
Iturgaitz buru dela hainbat PPko ordezkarik ekitaldia egin dute pic.twitter.com/j6VwZumV6Q
— Goiena Albisteak (@goiena) September 18, 2021
Ondoren, PPko elkarretaratzean parte hartu duten ordezkarietako batzuk VOX alderdi ultraeskuindarrak deitutako kontzentraziora batu dira. 12:00etan, Arizmendiarrieta plazan batu dira estatuko hainbat txokotatik etorritakoak; baita Ortega Smith eta Santiago Abascal ordezkariak ere. Hauek ere, Sareren kontra egin dute, gaurko agerraldia "preso jakin bati egindako omenaldia" dela esanez.
Bizilagunek VOXen agerraldia salatu dute leiho eta balkoietatik. Abascal buru, minutu bateko isilunea egin nahi izan dute Espainiar estatuko hainbat herritatik etorritako eskuindarrek. pic.twitter.com/hiO91Xe7bU
— Goiena Albisteak (@goiena) September 18, 2021
Bestetik, azken bi elkarretaratze horiek salatzeko, hainbat antifaxistak deituta, beste elkarretaratze bat egin da, 11:30ean, herriko plazan.
Hainbat antifaxistak deituta, Arrasateko plazan elkarretaratzea egin dute herritarrek. 'Faxismoaren aurrean antolakuntza ta borroka' lelopean, aldarrikatu dute faxistak "ez direla Euskal Herritik pasako". pic.twitter.com/SHSvlSsBtt
— Goiena Albisteak (@goiena) September 18, 2021
Zauritu bat, kargen ondorioz
Elkarretaratzeen ostean, tentsio uneak izan dira Arizmendiarrieta inguruan.Ertzaintzaren dispositibo zabal batek VOXen elkarretaratzea zaindu du, eta kazetariek soilik izan dute bertara sarbidea. Halere, ultraeskuindarrak eta antifaxistak polizia-lerrora gerturatu dira, eta hainbat objektu jaurtzearekin bat, istiluak hasi dira. Ertzaintzak kargatu egin du, eta istiluetatik kanpo zegoen adineko gizon bat zauritu da; zauria buruan egin du. Anbulantzian eraman dute ospitalera.
