Goizean –10:00etan hasita– kadete nesken eta kadete mutilen partiduak jokatuko dituzte. Kadete neskek Bergararen kontra jokatuko dute hiruko torneoan. Kadete mutilak, aldiz, Gasteizko Gure Auzune Klubeko taldearen aurka arituko dira (12:30). Arratsaldean gazte mailakoen (16:00) eta senior mailakoen (18:00) txanda izango da, eta hor ere biek ala biek Gure Auzunekoak izango dituzte aurrean.
Senior mailako taldeak Euskadiko Txapelketan neurtuko ditu aurten ere indarrak, eta iazko denboraldi gorabeheratsuaren ondoren gogotsu daude liga hasteko. Aurten Federazioak sei taldetako hiru multzo osatu ditu eta Mugarri-Ingou Arrasate taldeko mutilak oñatiarrekin batera daude B multzoan.