Arrasateko Sarek ohar bidez azaldu duenez, Unai Parotek Espainiar estatuan bete daitekeen "zigorrik handiena" bete du dagoeneko: 30 urte. "Zigorra beteta duenez, kalean egon beharko luke, baina espetxean zegoela berriz epaitu zuten ETAko kidea izateagatik. (…) Legeak dio gauza berarengatik ezin dela inor epaitu berriz", adierazi dute.
Arrasateko eragileak eta animatzen diren norbanakoak deitu dituzte kilometroak egitera: euskaltzaleak, pentsionistak, kirolariak, auzo elkarteetakoak, ostalariak, dendariak, feministak… Lehenengo kilometroan dispertsioa jasan duten presoen senide eta lagunek eramango dute testigua, baina kilometro hori eta azken hirurak "denek batera" egiteko deia egin dute Saretik. Azken lekukoa Oihana Parot Unai Paroten arrebak eramango du.
Urrats nahikorik ez
Sarek onartu duenez, azken hilabeteetan urratsak egin dira presoak gerturatzeko bidean, baina "nahikoa ez direla" azaldu dute. Horregatik honako bost eskaera hauek egiten dituzte: euskal preso guztiak Euskal Herriko espetxeetan egotea; gaixo dauden presoak eta 70 urtetik gorakoak etxean egotea; gradu progresioa aplikatuz, baimenekin ateratzeko aukera izatea; hiru laurdenak beteta dituztenak etxean egotea, baldintzapeko askatasuna aplikatuz; eta, bukatzeko, salbuespenezko legeekin epaitutakoei legedi arrunta aplikatzea.