COVID-19aren eta horren kudeaketaren inguruko informazioa ematea du xede ekimenak antolatzaileen esanetan: "COVID-19a dela eta eskubideen urraketa eta osasunari kalte egiten dioten neurriak agerian jarri nahi dira". Egungo egoeraren inguruko "hiritarren ezagutza suspertu" nahian antolatu dutela gaineratu dute Bizitza Plataformakoek: "Herriari hitza ematea eta sentitzen duguna, ikusten duguna eta pentsatzen duguna erdigunean jartzea du helburu".
Uztailaren 9an, egubakoitza, iritsiko da itzulia Arrasatera. 17:00ak aldera iristea aurreikusten da, eta 18:00ak arte herritik eta inguruetatik zehar ibilaldia egingo dute. 18:00etatik 22:00ak arte aldiz, Seber Altube plazan elkartu (euria egitekotan, Biteri plazan) eta hizlari ezberdinen adierazpenak entzun ahal izango dira bertan.