Hala eta guztiz ere, lehen txandan Gerardo Fernandezen kontra jokatu zuen arrasatearrak eta, "oso partida ona eginda", irabazi egin zion. Bigarren txandan, Jose Angel Besga beste bizkaitarraren kontra jokatu zuen eta hori ere irabazi egin zuen Tornayk. Gauzak horrela, hirugarren txandan dagoeneko torneoko liderra zen eta gainera, bi faborito nagusiak gaindituta. "Baina hirugarren txandan Mariano De Pablos nafarren aurka posizio oso on bat ez nuen aprobetxatu txapelketa ia erabakita lagatzeko eta bakarrik berdinketa lortu nuen. Horrela, zapatuko txandak bukatu ziren. Ni oraindik lider, baina azken partidarekin apur bat ikututa", azaldu du.
Txapelketako bigarren egunean, domekan, bi partida gehiago jokatu behar zituzten eta Tornayk nahikoa zituen 1,5 puntu titulua eskuratzeko. "Goizeko partidan gainera irabazteko posizioa lortu nuen eta gogor saiatu nintzen laugarren txanda horretan torneoa erabakita lagatzen. Baina denboraz gaizki ibili nintzenean abantaila galdu nuen eta aurkariak berdinketa eskaini zuen. Nik arriskatzeko erabakia hartu nuen. Erabaki txarra izan zen, berdinketa hor onartuta, azken txandan nire eskutan egongo litzatekeelako txapela irabaztea. Jokaldia txarto irten zitzaidan eta partida galdu nuen. Azken txandan erraz irabazi nuen, baina txapelketa dagoeneko nire eskuetan ez zegoen eta Besgak eta Fernandezek ez zuten euren partidetan huts egin". Elgoibarko Txarriduna Hotelean jokatu dute txapelketa.
