As Pontes lakuaren inguruan egiten den Galiziako Northwest Triman lasterketaren 7. aldian parte hartu du asteburuan Mikel Lasa Erle triatleta arrasatearrak. Distantzia luzeko proba egin du: 3,8 kilometro igerian, 180 bizikletan eta 42 korrika. Bere kategorian, beteranoetan, Ramon Arias Garciak bakarrik lortu du marka hobea egitea, ondorioz, podiumeko bigarren koskara igo da Lasa.
Beste hiru Ironman ere eginda dauzka, Gasteizen, Lanzaroten eta Katalunian: "Proba gogorrak direnez, denborarekin prestatu behar dira; ez da komeni halako lasterketa bat hiru hilabetetan prestatzea, progresiboagoa da prestaketa, burua asko erre daiteke-eta".
Triatloi erdia egitera animatu zen duela urte batzuk Zarautzen, eta gustatu zitzaionez, erronka berrien bila joan zen: "Alpe d'Huez-eko proban ikaragarri disfrutatu nuen, eta horrek lehen Ironmana egiteko indarrak eman zizkidan". Hala, 2015ean Gasteizeko Ironmana egiteko pausoa eman zuen.
Gosaria bere kontu
Antxintxikako korrikalarien usadioa da podiuma egiten duenak hurrengo egunean taldekideak gosaltzera gonbidatzea. Hala, denboraldi honetan bigarren aldiz tokatu zaio Lasari, Euskadiko Duatloi proban hirugarren sailkatu baitzen: "Normalean Iñigo Altzolak gonbidatzen du, baina aurten ez da bakarra izaten ari".
Datozen probei buruz galdetuta, distantzia erdiko lasterketetan parte hartuko du epe laburrean, "denbora asko kentzen duelako halako proba luzeak prestatzeak".