"Aurten, pandemia dela eta, Ibai-Arteren lankidetza ezin hobearekin soilik izan da posible tonbola berriz jartzea. Horrekin batera, baita Harreman Dendako bidezko merkataritzako produktuen salmenta ere", azaldu dute Harremanetik. Jendearen parte-hartzea "ikusgarria" izan zen, eta batutako diru kopurua, 1.853,90 eurokoa. "Diru kopuru hori Ankur harrera-etxera bidaliko dugu. Han, Mumbai hiriko eta Indiako kale eta auzo txaboletako 200 neska jasotzen dituzte eta bertan etorkizun duina, hezkuntza, janaria, osasuna, zainketa orokorra eskaintzen zaie", gaineratu dute.
Hori dela eta, Harremanek eskerrak eman dizkie arrasatearrei emandako laguntzagatik. "Aldi berean, mundu duinago baten alde lanean jarraitzera animatzen ditugu. Denok pozik sentitu beharko ginateke txartelak erosiz egindako ekarpenekin, horrela jende askoren bizitza duina izan dezaten laguntzen diegu".