Atzo arratsaldean jokatu zuten Espainiako Txapelketako bigarren partidua Ointxe! Araskiakoek; bigarrenean baina, ezin izan zuten lehenengoan bezala norgehiagoka irabazi eta Arrasatekoek 85-39 galdu zuten Valencia Basketen kontra.
"Hasieran partidua nahiko berdinduta egon zen, baina bi taldeen arteko ezberdintasun fisikoa oso handia zen, eta hor egon da gakoa. Txapelketa osoko faboritoen artean daude Valentziakoak" azaldu du Ointxe! Araskiko entrenatzaile Alex Susok.
Final zortzirenak, bihartik
Dena den, multzoko lau taldeetatik hiru pasatzen direnez final-zortzirenetara, eta arrasatearrek egubakoitzean mendean hartu zuten Heliosek atzo ere galdu egin egin zuenez, Ointxe! Araskikoek txapelketan aurrera egitea lortu dute. Gaur, domeka, 17:00etan izango dute multzokako faseko azken partidua Leongo Jesuitinasen kontra eta badu bere garrantzia, multzoko bigarren eta hirugarren zeintzuk izango diren erabakiko delako, eta horrek eragina izango duelako bihar hasiko den kanporaketa fasean.
Hemendik aurrera gertatzen dena gertatzen dela ere, final-zortzirenetara igaro izanarekin pozik daude Arrasatekoak, eta horren erakusgarri atzoko ospakizunak. "Gure helburua zen multzoko lehen hiruren artean egotea, eta gero gainditzeko modukoa den aurkari baten kontra aritzea. Dena den Espainiako hamasei talde onenek egingo dugu aurrera, beraz baia edo bai zaila izango da", adierazi du Susok.