Sei hilabeteko epea "nahiko gutxi" iruditzen zaio Maria Ubarretxena alkateari. "Ez dakit amaituko duten epe horretan. Dena den, osoko bilkuran onartu ostean, enpresarekin kontratua sinatuko dugu eta asmoa da irailean hastea lanak. Aurreikuspenaren arabera, 2022-2023 ikasturtea eraikin berrituan egiteko moduan egongo dira eragile eta taldeak", adierazi du.
Teknikarien esanetan, obraren zati potoloena eginda dago. Hau da, oinarriak, zimendua, indusketa, fatxadaren egonkortzea eta geotermiaren instalazioa eginda daude; eta isolatzeak, ia bukatuta. Barruko banaketari dagokionez, sotokoa, beheko solairukoa eta lehen solairukoa eginda daude, bigarren solairukoan zerbait falta da oraindik eta hirugarren solairuko banaketa egiteke dago.
Bestalde, leihoak, azken solairuko gortina-hesia, instalazio elektrikoa, klimatizazioa, megafonia, suteen aurkako sistema, iturgintza eta arotzeria guztia ere egiteko daude oraindik.
6.520.836 euroko kostua
Proiektu hau lizitaziora atera zenean, 7.480.518,91 euroko prezioa zeukan. Lurgoien enpresari esleitu zitzaion, 5.849.544,78 eurotan. Hala ere, enpresa horrek egindako zatia 2.529.431,9 eurokoa izan zen. Orain, Construcciones Moyuari esleitutakoari Lurgoienek egindako zatia gehituta, 6.520.836,68 eurokoa da obraren kostua. Gainera, Gobernuak azaldu duenez, 239.776,57 euroko abalarekin ordaindu ahal izan ditu obrak sortutako gastu gehigarri guztiak.
Hemen taula ikusgai:
