Pandemia egoera honetan, "justizia sozialak planetako eskualde pobreenekiko elkartasun apur bat gehiago" eskatzen dute, eta, testuinguru horretan, Arrasateko hainbat gobernuz kanpoko erakundek, besteak beste, Activos por un Mundo Solidariok, Harreman-Arrasatetik Mundurak, Mundukidek eta Sersok, XXII. Elkartasun Eguna egingo dute arrasatearrekin batera.
Pandemiaren ondorioz aurreko urteetako jarduerak murriztu diren arren, Ibai-Artek babestutako tonbola izaten jarraituko du. "Tonbola Ibai-Arte eta Harremanen ekimenez sortu zen, eta beti arrakasta izan duen arren, egin dezagun arrakastatsuago! Aurtengo tonbolan 200 bat sari izango ditugu, Ibai-Arteko dendetako ekarpenei esker, eta gainera, Ibai-Arte saria ere zozketatuko da. 300 euroko saria erosketa-baleetan, elkarteko edozein saltokitan produktuak erosteko", azpimarratu dute.
Tonbolarekin lortutako dirua Indiako Ankur proiektura bideratzen dute urtero eta aurten ere hala izango da. "Mumbai hirian kaleetan eta slumatan bizi diren berrehun neskatoren harrera-etxea da Ankur. Han, elikatzeaz eta arreta medikuaz gain, giza, lanbide eta adimen prestakuntza ere eskaintzen diete helduarora iritsi arte, garapen integrala emanez eta etorkizun duinerako prestatuz".
Bidezko merkataritza ere presente
Beste urtebetez, bidezko merkataritzaren presentzia ere izango da azokan, Harreman dendarekin. Era horretan, bidezko merkataritzako produktuak ezagutarazteaz gain, txokolate-jan bat eskainiko dute, dastatzera datozen pertsonei gozarazteko. "Pertsona guztien babes eta elkartasunarekin beste mundu hobeago bat posible egiten dugu", gaineratu dute.