Ludopatiaz informatu eta sentsibilizatzeko helburuarekin, bi hitzaldi antolatu ditu Arrasateko Udal Prebentzio Zerbitzuak eta lehena ekainaren 2an izango da, eta Vianak ludopatiarekin bizi izandako testigantza emango du, nola hasi zen jokoarekin, nolakoa izan den bere egunerokotasuna jokoaren menpe eta zer eragin izan duen jokoak bere bizitzan. Hitzaldia 18:30ean izango da Kulturateko areto nagusian, euskaraz.
Bigarren hitzaldia berriz, ekainaren 9an, eguaztena, izango da, Ludopatia: jokoa ez da jolasa izenburupean. Hitzaldia Karmele Gurrutxaga Bastidak emango du, Jokalari Anonimoak Elkarteko psikoterapeutak, eta ludopatiaren begirada sozioekonomiko orokorretik abiatu eta ludopatia adikzio eta gaixotasun bezala deskribatuko du. Jokatzen uzteko lehen pausoez, eta "bizitza normalera" itzultzeko bideen eta pausoen gainean ere arituko da. Hau ere 18:30ean izango da Kulturateko areto nagusian, gazteleraz.
Plaza mugatuak izango dira eta segurtasun eta prebentzio neurri oro betetzea "ezinbestekoa" izango da.
