ELA sindikatuak salatu duenez, Aita Menni ospitaleko zuzendaritzak ez die erantzunik eman, eta langileen baldintzak ez dira hobetu: "Hiru urte igaro dira negoziaketa martxan jarri zenetik. Langileen lan baldintzen kontura negozioa egiten jarraitzen du zuzendaritzak eta ez dauka inolako interesik kolektiboaren aldarrikapenei erantzunak emateko".
Horren harira, sindikatuak gehitu du azken urtean 1,7 milioi euro baino gehiago fakturatu dituela Aita Mennik eta azken lau urteetan 10 milioi eurotako inbertsioak egin dituela. "Bitartean, sekulako lan kargak dituzte langileak, errotazio ikaragarria dago eta prekarietatea euren azaletan bizi dute", azaldu du. Hala, asteazkeneko mobilizazioetara batzeko dei egin dute: 7:30ean pikete informatiboak egingo dituzte ospitalean, 11:30ean mobilizazioa Arrasateko plazan eta 14:00etan elkarretaratze zaratatsua ospitalean. Bestetik, adierazi dute Gipuzkoako pentsiodunek egingo duten bizikleta martxaren amaieran ere, pentsiodunek Aita Menniko gatazkarekiko babesa agertuko dutela.
