San Isidro Eguna da gaur, baserritarren eguna eta hileroko azokarekin ospatu dute Arrasateko baserritarrek. Hamasei bat postuk osatu dute azoka, saltzaileetako asko eta asko ohikoak hileroko hitzorduan. Berezitasunen artean gaurkoan bidezko merkataritzako Harreman dendako ordezkarien presentzia. Kafea eta txokolatea eraman dituzte azokan saltzeko. Horrekin batera bereziki ikusgarriak eta jendetsuak izan dira loreen postuan; bi izan dira. Gutxitu egin direnak barazki postuak izan dira.
Gainerakoan, gazta, ogia, gozoak, eztia, marokoar jakiak, ahate gibela, barazkiak, xaboiak, kremak, eta egurrezko tresnak izan dira salgai. Gure Eskuk ere postua jarri du gaurko azokan.
Aurreko hilabeteetan baino erosle gutxiago ibili dela adierazi du saltzaile batek baino gehiagok. Eguraldiari egotzi diote jaitsiera eta horrekin batera mugikortasun neurriak arindu izanari. Erosketak egin dituztenek, dena den, saria izan dute; izan ere, Aretxabaletako mozkorra tomate landareak banatu ditu Mankomunitateak eta horrekin batera zozketa baterako txartela jaso du erosle bakoitzak.
