Azokan, gainera, "txokolate gozo batzuk" dastatzeko aukera izango dute gerturatzen direnek, eta erosketa bat egiten dutenek tableta bat opari eramateko aukera ere bai.
Maiatzaren 18an, The Chocolate Case filma eskainiko dute Amaia Antzokian, 19:00etan. "Pelikulak kazetari holandar batzuek Afrikako kakao landa eremuetan bizi izandako esperientzia kontatzen du, eta horren ondorioz hartutako erabakiak azaltzen ditu. Filma benetan interesgarria da, eta momentu askotan, hunkigarria", adierazi dute.
Pelikula amaitu eta gero, gainera, zine-foruma egingo dute, Itsaso Sanchezen eskutik. "Medicos Mundi Arabako Komunikazio eta Eraldaketa Sozialerako teknikaria da. Gertutik ezagutzen du kakaoaren produkzioaren inguruko errealitatea eta horren berri eman eta pelikulari buruzko tertulia izango dugu berarekin".
Amaitzeko, maiatzaren 24an, Nekane Jurado Ekonomista eta Psikologo Klinikoak hitzaldia egingo du Kulturateko areto nagusian, 18:30ean. "Nekanek gai ugari ukituko ditu, bidezko merkataritza barne, eta ikuspegi kritikoa emango digu ekonomiari buruz. Hitzaldiaren izenburua Economia, cooperación y conciencia da, hitzaldia gazteleraz izango delako", gaineratu dute.