Beroak markatutako partidua izan da gaur arratsaldean Mondrak eta Euskaldunak Mojategin jokatu dutena. Erritmo onean hasi diren arren, minutuak aurrera joan ahala bero handiak moteldu egin du jokoa. Emaitza ikusita, baina, badirudi arrasatearrak hobeto egokitu direla, eta hala, 2-0 irabazi diote Euskaldunari.
Iker Pavonek egin du arrasatearren lehen gola lehen zatian, eta gero kontrara jokatzea egokitu zaie. Partiduaren amaiera aldean etorri da etxekoen bigarren gola Jokin Gorostolaren eskutik. Aipatzekoa gaurkoa izan dela Gorostolak Mondrarekin jokatu duen azken norgehiagoka.
Ander Romero Mondraren entrenatzailea gustura agertu da partiduaren ostean: "Aurrera egitearekin pozik nago, partidu gehiago jokatuko ditugulako. Eta jokalariengatik ere bai, badirudielako ez baduzu irabazten ez duzula balio".
Kopako lehen aurkaria, Touring
Behin Euskaldunaren kontrako kanporaketa irabazita, Touring izango du aurkari Mondrak Kopako lehen neurketan. Hurrengo asteburuan izango da norgehiagoka, Errenterian.
