Aurreko edizioetan ez bezala, jendeak ezin izan du aurrez aurre ikusi aurtengo finala, eta parte hartu duten 45 taldeak hiru egoitzatan banatuta egon dira, 15 egoitza bakoitzean. Egoitza bakoitzean, bi talde sailkatu dira estatuko finalerako: defendatu behar zuten erronkaren hiru esparruetan osoena izan dena eta proiektu berritzaile onena aurkeztu duena. Mondragon Unibertsitatearen egoitzan, Arrasaten, honako hauek izan dira irabazleak: Gernikako San Fidel ikastolako Sanfitek taldea, talde osoena; eta Arrasateko Arizmendi Ikastolako Neskek Eraldatuz Teknologiaz Arizmendi Ikerlan taldea, proiektu berritzaile onena aurkeztu duena.
Estatuko finalera, ekainean
Donostian eta Deuston irabazle izan diren beste taldeekin batera, guztira sei dira, First Lego Leaguen estatutako finalean izango dira Arizmendiko taldeko kideak. Ekainean izango da, online, eta, bertan, nazioarteko txapelketetarako plaza bat lortzeko aukera izango dute.
