Gipuzkoako diputatu nagusi Markel Olano eta Sustapen Ekonomiko, Turismo eta Landa Inguruneko diputatu Jabier Larrañagak Ikerlanen, Mondragon Korporazioaren zentro teknologiko kooperatiboaren Arrasateko instalazioak bisitatu dituzte gaur.
Hala, Aldundiak martxan dituen proiektuak eta lan ildoak partekatzeaz gain, foru arduradunek Arrasateko instalazioetan dauden lehen mailako laborategiak eta ekipamenduak ezagutu ahal izan dituzte.
Ikerlan, eredu
Olanok azaldu duenez, berrikuntza eta ezagutza aurreratua sortzea funtsezkoa da Gipuzkoako sendotasun industrialari eusteko eta lurraldeko sare ekonomikoa etorkizun handieneko sektoreetara bideratzeko. Gaineratu du Gipuzkoak I+G+b ekosistema "sendoa eta dibertsifikatua" duela eta Ikerlan jarri du "teknologia enpresetara transferitzearen" eredu gisa.
"Ikerlanen lan-ildoak guztiz lerrokatuta daude azken urteetan garatzen ari garen Gipuzkoako etorkizuneko proiektu estrategikoekin", gaineratu du diputatu nagusiak eta horren adibide jarri du Mubil mugikortasun adimendun eta jasangarriko zentroan duen parte-hartzea.
Ikerlanetik, bestalde, azpimarratu dute funtsezko partner teknologikoa direla Euskal Herriko eta bereziki Gipuzkoako enpresa traktore nagusientzat, eta eskerrak eman dizkiete Gipuzkoako Foru Aldundiari "urte hauetan guztietan jasotako lankidetzagatik eta emandako laguntzagatik". "Etorkizunean ere hala izatea espero dugu, Gipuzkoako eta Euskadiko industriaren erronkei aurre egiteko.