Kanpazar Arrasate-Ordizia taldeak porrota jaso du etxean Sarako Izarra talde indartsuaren aurka. Iparraldekoek, zigor-kolpeen bidez 0-12ko abantaila lortu dute lehen zatian, eta ostean entsegu garrantzitsua lortu dute markagailuan 0-19koa jartzeko. Lehen zatia bukatzeko zorian zegoela, Arrasatekoek entsegua eskuratu dute, eta atsedenaldira 7-19koarekin joan da neurketa.
Bigarren zatian, zigor-kolpe bana eskuratu dituzte bi taldeek (10-22), eta Izarra jokalari bat gutxiagorekin gelditu ostean, 17-22 gerturatzea lortu du ARTk. Hala ere, Izarraren erantzuna ona izan da, eta zigor-entsegu oso garrantzitsua lortu du 20-27koa markagailuan ezartzeko. Azkeneko txanpan, baloia zuri-moreena izan da, baina ez dute Sarako taldearen defentsa urratzerik lortu. Defentsan akats bat egin du Kanpazar Arrasate-Ordiziak, eta azken emaitza 20-34koa izan da.