Bi hitzaldietan parte hartzeko izen-emateak irekita daude dagoeneko, arrasate.eus atarian. Lehenengoari Haurrak eta pantailak: erabilera kontzientea eta onuragarria sustatzeko hitzaldia izena jarri diote, eta bertaratzeko bi aukera egongo dira. Bata, euskarazko saioa, apirilaren 26an garatuko dute, eta bestea, gaztelerazkoa, hurrengo egunean. Bi hitzorduak Kulturateko Jokin Zaitegi gelan izango dira, 17:30eatik 19:30eara. Apirilaren 22an itxiko da apuntatzeko epea.
Bestetik, 12 eta 18 urte bitarteko gurasoek Zeintzuk dira nire alaba-semearen erreferentzia gune eta pertsonak espazio digitalean? izeneko tailerrean parte hartu ahalko dute. Hori maiatzak 6an izango da, 17:30etik 19:30era. Euskaraz jaso nahi dutenek Jokin Zaitegi gelara bertaratu beharko dute, eta gazteleraz jaso nahi dutenek, berriz, Kulturateko areto nagusira. Izen-ematea maiatzaren 4rarte egongo da zabalik.
Bestalde, oraindik zabalik dago seme-alaba nerabeak dituzten gurasoei zuzendutako Adimen emozionalari buruzko tailerrean izena emateko epea, apirilaren 22an itxiko baita. Saio horiek ostegunetan izango dira, apirilaren 28an, maiatzak 12an eta 26an, eta ekainak 9an, 17:00etatik 18:30eara. Donna Apellaniz Nieto izango da dinamizatzailea.