Iazko batzar orokorrean hala onartuta, Borondatezko Gizarte Aurreikuspeneko Erakunde (BGAE) bihurtu zen San Felipe Elkarlaguntza Elkartea, erregimen berezia daukana eta aseguru-jarduerarik egiten ez duena. Hori dela eta, auditoretzak eta eskatutako hornidura teknikoek "ikuspegi lasaigarria" eskaini diote elkarteari. "Informazio hori azaltzeko eta, hala badagokio, onartzeko, San Felipeko bazkide titularrei dei egiten diegu ohiko batzar nagusirako", azaldu dute.
Hau da gai-zerrenda:
1. Bileraren akta onartzeko 2 bazkide hautatzea.
2. 2020ko kudeaketa-txostena.
3. 2020ko urteko kontuak irakurtzea eta onartzea.
4. 2020ko txosten aktuariala.
5. Lokala eta bere ekipamendua erosteko eta beilatoki gisa alokatzeko proposamena.
6. Auditoreekin egindako hitzarmena onartzea.
7. Diru-sarreren eta gastuen aurrekontua 2021erako, eta zenbatekoak eta kuotak ezartzea.
8. Gobernu Batzordeko karguak berritzea.
9. Galderak eta eskaerak.
Bosgarren puntuan lokal bat eta bere ekipamendua erostea sartu dute, ondoren "konfiantzazko ehorztetxe" bati alokatzeko, beilatoki gisa. "Proposamen honen norainokoaren eta garrantziaren arabera, batzarrean, eta bozketa egin aurretik, egungo egoera testuinguruan kokatuko da, hura egitera bultzatu gaituzten arrazoiak zehaztuko dira eta inbertsioaren zenbatekoa eta gure erreserbetan izango duen eragina azalduko da, bai eta San Felipeko kideek kontrapartidan izango dituzten onurak ere", azpimarratu dute.
