Heriotza duina izateko eskubidea "ezkerrak defendatzen duen gizakiaren duintasunari buruzko gai sentikorrenetako bat" dela iritzita, Ezker Anitzarekin lotura duen Fec-Euskadi elkarteak La Promesa dokumental sarituaren proiekzioa antolatu du Kulturateko areto nagusian, gaur arratsaldean, 18:30ean hasita.
Amaitzean, dokumentaleko protagonista den Maribel Tellaetxeren senarrak (Txema Lorente), doluan aditua den Victor Landak eta Isabel Salud Ezker Anitzako koordinatzaileak hartuko dute hitza, besteak beste. Aipatzekoa da Salud heriotza duina babesteko eskubidearen lege proiektuko komisioko kide izan dela Espainiako Parlamentuan. Lege proiektu hori martxoaren 24an onartu eta uztailaren 25ean jarriko da indarrean.