Zapatu goizean, Getxon, Espainiako Txapelketarako aurre-aukeraketa jokatu zuten, eta Irati Izurrategi aritu zen saio horretan, kata zein kumite modalitateetan. "Lan handia egin zuen, nahiz eta gainontzekoek erakutsitako goi maila dela eta, oso zaila den aukeratua izatea. Hautatzaileen esku dago erabakia".
Arratsaldean, berriz, Illescasen, AIDIS-Nisseishi 2021 txapelketa jokatu zuten, eta Espainia mailako klub askok hartu zuten parte –300 karatekatik gora–. Jon Torres (Junior -55kg.) eta Danel Izurrategi (Kadete -63kg.) aritu ziren. "Jonentzat lehen txapelketa zen junior mailan. Borroka ona egin zuen, baina 2-0 galdu zuen eta gero bigarren aukerarik gabe geratu zen", dio Sanchezek.
Danelek, bestalde, torneo "bikaina" jokatu zuen, aurkako puntu barik eta borroka guztiak irabazita. "Galdu zuen borroka bakarra epaileek erabakitakoa izan zen, borroka 0-0 amaitu ostean. Aurkari horrek irabazi zuen gero txapelketa. Horri esker, Danelek bigarren aukera eduki zuen, brontzezko domina lortu ahal izateko, eta baita lortu ere".