Apiril honetan beteko ditu Unai Parotek 31 urte espetxean, eta horren harira, Unai etxeratzeko bidea gara izeneko dinamika jarriko du martxan Arrasateko Sarek. Kolektibotik azaldu dute "indarrean dagoen legedi arrunta aplikatuz gero, aspaldi" beharko lukeela kalean, eta gaineratu "Unairi asmatutako trikimailu juridiko berriak" aplikatu dizkiotela eta "oraindik etxetik 1000 kilometrora, isolatuta eta dispertsatuta", mantentzen dutela kartzelan.
Agerraldia, 31 urte bete dituztenek
Hori dela eta, aurten 31 urte beteko dituzten herritar desberdinek agerraldi bat egingo dute Aldai parkean, hileta zibilak egiten diren lekuan. Hitzordu hori datorren asteartean egingo dute, martxoaren 23an, 18:30ean. Agerraldi horretan, dinamika aurkeztearekin batera, datorren igandean, martxoaren 28an, 12:30ean egingo den manifestaziorako deialdia egingo dute.