Udara begira "Arrasate ederrago bat" aurkezteko helburuz, herriko banku eta eserleku publikoak egoera "ezin hobean" jarri nahi ditu Arrasateko Obra, zerbitzu, mantentze eta auzoen Sailak. Lan talde horren buru den Victor Fuentes zinegotzi sozialistak adierazi du "udaberriaren eta eguraldi onaren etorrerarekin", bizilagunak kalera aterako direla. Zinegotziak gaineratu du "bizi dugun pandemiarekin eta herritarrak kalera gero eta gehiago aterako direla jakinda, Arrasate garbi eta itxura ederrarekin egotea" nahi dutela.
Lanak egiteko, lehenik bankuak brigadaren instalakuntzetara eramaten dituzte, bertan egurrak atera, lixatu eta margotzeko. Ondoren bankua bere jatorrira itzuli eta bertan muntatzen dute.
Ia 600 bankutatik, 100 baino gehiago konponduta
Udal brigadako langileek eta Lanbideren bitartez kontratatuko pintoreek bankuen mantentze lanei ekin diete dagoeneko. Zehazki ondorengo guneetako bankuak berregokitu dituzte: 10 banku Donestebe portuko kalean, 20 Santa Teresa kalean, 11 Naosantiago kalean, 16 Musakolako Jubilatuen plazan, 4 Toki Argi atzekaldean, 2 Itxaropena plazan, 8 Uribarriko elizaren atzekaldean, 6 Arruena parkean, 9 Obenerreka kalean, 6 Munar kalean, 4 Zarugalden, 9 Antso Abarkan, 2 Bedoña auzoan eta beste 2 Zuberoa kalean. Orotara, 100 banku baino gehiago, beraz.
Datozen asteetan jarriko dira Erdiguneko, Zarugaldeko, Munarreko, José Luis Iñarrako, Ospitaleko, Zalduspeko, Santa Teresako, Santamarinako, Obenerrekako, Makatzenako, San Andreseko, San Joxepeko, Musakolako, Erguingo, Usaetxeko, Gorostizako, Uribarri etorbideko, Uribe auzoko y Arimazubiko gainontzeko bankuak txukuntzen.