Martxoaren 20ko baserritarren azokan udaberriaren hasieran prestatzen den karapaixoa izango da nobedade nagusia. Garipua edo mokotza izenez ere ezagutzen da erromanizazioaren aurreko jaki sakratua. Antzina naturari eskaintzen zitzaion udaberriari ongietorria emateko zeremonietan, eta esanahi sinbolikoak zeuzkan: gariak ugalkortasunari egiten zion keinu, eta, arrautzak, bizitzari.
Gaur egun tradizioa izaten jarraitzen du ama pontekoak bere alaba edo seme pontekoari eskaintzea garizuma garaian, harik eta gazte hori ezkontzen den arte.
Eskuorria eta zozketa
Herriko zenbait ekoizlek ekarriko dute azokara bakoitzak bere erara prestatutako karapaixoa: betiko erara egindakoak, ama orearekin egindakoak, legami freskodunak, irin ekologikoaz egindakoak, gluten gabekoak, begetarianoak eta beganoak. Enkarguak jasotzeko edo hartzeko aukera egongo da bertan, gainera.
Bestalde, azokako bezeroen artean hamabi karapaixo zozketatuko dituzte, baita hileroko otarra ere. Etxean ikasi nahi dutenentzako karapaixoa egiteko esku orriak banatuko ditu Udalak, errezeta eta osagai desberdinen informazioarekin.