Erraiak dokumentalak 20. saria jaso berri du, eta ez nolanahikoa. Izan ere, World Distribution Award lehiaketan dokumental onenaren saria jaso du, eta horrek esan gura du Ekain Martinez de Lizarduyren lana hizkuntza desberdinetara itzuli eta mundu zabaleko tokiko 40 telebista katetan emitituko dela: Hegoafrikan, Alemanian, Txekian, Eslovakian, eta abar.
"Sorpresaz sorpresa aritu naiz, eta honako hau sari borobila izan da. Balio handikoa zabalkundeari begira, munduan zabalduko delako irrintzia…", esan du Martinez de Lizarduyk.
Indiako lehiaketara
Irrintziaren gaineko dokumentala festibal askotara bidalita, aitortza izan duela adierazi du Lizarduyk, eta, gaur-gaurkoz, ez dela lana inora bidaltzen ari. "Azken finean, lehiaketetako epaimahaikideak ezagutzen dute elkarren artean, eta, batak besteari gomendatuta, leku ezberdinetatik ari zaizkit lana bidaltzeko eskatzen; azken egunetan, Indiatik eskatu didate, esaterako."
