Valentziako Luis Puig belodromoan egin dituzte asteburuan Espainiako 23 urtez azpiko txapelketak, eta atzoko –domeka– saioan Eneko Carrascal izan zen onena salto hirukoitzean. Alde handiarekin, gainera. Arrasatekoak lehenengo saiakeratik lortu zuen 15 metroko langa gainditzea (15,14), eta lan-saio osoan salto hobeak egiten joan eta gero (15.29, 15.62, 15.65, 15.69) seigarrenean, azkenekoan, ondu zuen marka pertsonala (15.94). Hala, 16 metroko langatik 6 zentimetrora geratu zen arrasatearra, eta kontrarioek urrunetik jarraitu zuten Carrascalen txapelketa, bigarren sailkatu zen Alexander Barreirori 95 zentimetroko tartea atera zion-eta.
Atsedenik hartu barik, urteko hitzordu garrantzitsuetako bat asteburuan izango dute atleta arrasatearrek, Espainiako txapelketa absolutua jokatuko dute eta Madrilen. Eta, dominengatik borrokan ibiltzeko hautagai den Malen Ruiz de Azua izango da gaur Harmailatik saioan.
