Bosgarren ekintza horretan, adierazi dutenez, zera ikusarazi eta salatu gura dute: transnazionalek, mugek eta migrazio-politikek sistema arrazista, kolonial, kapitalista eta heteropatriarkalaren tresna gisa duten funtzionamendua. "Pertsona migratzaileen bizitza bortxatzen ari baitira hemen eta haien jatorrizko lurraldeetan", gaineratu dute. Era berean, "Europako ongizatearen oinarri diren pribilegioak identifikatzera eta logika horretan dugun eginkizunari eta erantzukizunari buruz hausnartzera" gonbidatu dituzte herritarrak, "eta, arraildurei erreparatuta, sistema honi pitzadura berriak eragitea alternatibak proposatuz, bai banakakoak bai kolektiboak ere".
Otsailean zehar landu ostean, martxoaren 6an emango diote amaiera ekintza horri, eta Martxoaren 8ko ekimenarekin indartzea gura dute. "Horregatik, aurreko urteetan horren arrakastatsua izan den M8 plataforma deitzen dugu. Denon artean hausnartu eta antolatzeko, otsailaren 6an, 10:30etan, Kulturateko areto nagusian, egingo dugun asanblada irekira gonbidatzen zaitugu".
COVID-19aren aurkako protokoloak errespetatuko dituzte. "Lokalaren edukiera, musukoa, distantziak eta garbiketa neurriak zorrotz beteko dira. Elkar zainduko dugu". Halaber, euskara gaztelera itzulpen zerbitzua egiten saiatuko direla azpimarratu dute. "Zatoz eta zubiz betetako bide honetan izan gaitezen bidelagun! Elkarrekin gara eta elkarrekin izango gara!".