Duela bi hilabete jarri zuen ELAk Aita Menniren kontrako salaketa Osalanen eta Lan Ikuskaritzan, eta oraindik erantzunik jaso ez dutela-eta, mobilizazioa egin dute gaur. "Ospitaleko egoeraren larritasuna azpimarratu genuen, eta oraindik ez daukagu erantzunik", adierazi dute.
Protestan egon diren langileen arabera, lan-baldintzak ez doaz hobera. Aita Menniko UDI unitatean positibo berriak daude (hiru egoiliar eta bi langile daude kutsatuta), eta langileek "lan-karga izugarriak" dituztela adierazi dute. Horrekin batera salatu dute enpresak ez duela "informaziorik partekatzen" enpresa batzordearekin: "Ez dira partekatu txertaketa-protokoloak, ezta prebentzioaren arloko protokoloak ere, eta gai horiek aldez aurretik adostu behar dira ordezkariekin".
Bestetik, azpimarratu dute "ezinbestekoa" dela hitzarmen kolektiboa negoziatzea, eta bide horretan urratsik ez badago, mobilizazioekin jarraituko dutela aurreratu dute.